裡補，安見得來勿及介？”寶玉道：“奴也是格格意思，格落要緊煞轉哉，不過請落裡格郎中好？俚格病重極勒海，推扳點格郎中吃勿光格。
”阿金接嘴道：“要末仍舊去請陳笃卿來看罷，眼睛門前，終算俚最有名氣點。
”寶玉道：“奴前頭請過歇俚，吃仔俚格藥，勿好，虧（讀區）得換仔金寶山勒好格，啥落故歇闆要請俚介？”阿金道：“金寶山是女科格專門，格落我仍想請陳笃卿呀，作興藥有藥緣，吃仔倒對格也未可知，且得試試看。
”寶玉聽他一說，卻也想不出别個，隻得依允，立刻就差相幫去請，不表。
仍說寶玉差人請醫後，想起家中近日生意如何，便向玉蓮等細問，玉蓮答道：“近來着實呒啥，日日有兩台酒，有兩桌和格，而且新添仔兩個戶頭：一個做月仙妹子格末，姓屠，是漢口人，場面野闊笃，來仔三四埭，已經擺過仔兩轉雙台格哉；一個做奴格末，就是前頭要做林黛玉，托姓袁格朋友出面，邀賀老去吃酒格，奴轉來告訴歇阿姆，阿姆終想得出格勒。
”寶玉道：“格件事體，勿長遠勒，阿就是說格湖州人，開絲棧格小老闆，姓黃格佬？”玉蓮道：“一點也勿差，就是俚呀！酒未擺過仔一台，和倒碰仔三場哉。
”寶玉道：“阿曉得俚搭黛玉，到底阿有花頭佬？”玉蓮道：“奴也問歇俚格，據說俚是搭黛玉要好得頭才割得落，隻少得讨俚轉去快哉，難末奴勿相信，對俚說：‘既然實梗末，哪哼夾忙頭裡，想着到奴搭來哉？’俚說道：‘越做得多，場面越闊，起碼總要三四個，叫起局來便點，呒不做煞一家格。
況且黛玉是大先生，是小先生，就算登勒一淘，俚也勿見得會吃醋格。
倒說格套閑話，阿是拿我讨厭，我來呢啥？’奴聽俚着末兩句，倒隻好搭俚賠勿是，難末算完結，響啥哉。
”寶玉道：“格格姓黃格，據奴猜上去，實頭是格瘟生笃，銅钿銀子勿在乎，濫使濫用，要騙點俚倒容易格，不過倪終有限，至多一千八百末哉。
将來黛玉末大吃牢，俚闆上黛玉格當，讨俚轉去，弄得一塌糊塗，人财兩空，賽過替俚(仔一個浴，連謝才弗謝一聲格勒。
唔笃勿相信，伸長仔頭頸看末哉，闆有實梗格一日格。
”玉蓮等皆點首稱是。
芸台道：“奴格搭仍舊是格班老客人，僅不過日日勿脫空罷哉。
”
母女們談談說說，不覺已到午牌時候。
請醫生的鼈腿早來回覆，說：“郎中要五下鐘來得勒。
”所以眼前寶玉也無法可想，吃過中飯，親自下樓去看了一趟。
因阿二今日受馬車颠簸，未識病勢可有變端否，及至一看，倒也不過如斯，惟依然不言不語，籲籲氣喘，大約無甚變動，且待醫生到來再說，此時隻得回轉樓上。
忽然阿金問道：“大先生，倪故歇轉來仔，阿要去燒回頭香勒介？”寶玉道：“自然要